民族医药健康网
首页 足球之神 赛车时代 足球100分 众神播报

管教育一塌糊涂 睇樱花局长最叻

发表于2020-02-12

话口未完,寻日立法会教育事务委员会嘅公听会又出事喇。係咁嘅,会上讨论大学校监委任制度问题,议题本身已经够晒惹火,加上吴克俭表现拙劣,结果议事堂上炮声隆隆,沦为众矢之的,学生代表及与会团体狂轰佢净係识去旅行睇樱花,叫佢咪阻住地球转,快啲落台喎,都咪话唔面懵。

又难怪学界反应咁激烈嘅,事关吴克俭上任以来点止一事无成吖,直头添烦添乱喇,由国民教育胎死腹中开始,政策推出一项跪低一项。好似最近佢推销「一带一路」十亿奖学金咁吖,一味叫人为学生福祉着想,但到底学生有乜得着又讲唔出,反对派固然反对,连建制派议员都撑唔落去,批评政府所託非人。眼看闯关变撞墙,政府惟有死死气话「民生先行、先易后难」喎,咪即係举白旗投降咁解啰。

吴克俭被指能力低都係其次,最恶顶係佢老哥不务正业。冇冤枉o架,就讲TSA争议吖,学生、家长、教师怨声载道,佢不但冇扑火降温,反而跑到日本梳乎,又赏樱花,又食放题,仲欣赏当地美女添,咁嘅态度,唔畀人闹爆至奇。仲有吖,早前城大绿化天台倒塌,差啲搞出人命,佢竟然话本来谂住放假好舒服,暗示事故令佢假期泡汤,有冇再凉薄啲吖。

讲起呢几年嘅教育乱象,真係十只手指都数唔晒,净係一场红雨咋,都可以搞到七国咁乱,唔怪得每次问责官员民望调查,佢老哥都係包尾大幡喇。最讽刺嘅係,次次搞出镬,呢位大男人就习惯性匿喺「好打得」嘅政务司司长林郑月娥身后,裙脚仔形象深入民心,简直唔知丑字点写。

不过咁,吴局长都唔係一无是处嘅,起码讲到旅游外访同埋知识渊博,佢认第二,冇人敢认第一。有数得计,佢上任以来,出国考察多达三十七次,耗费二百多万元公帑,足迹遍布七大洲五大洋,想唔认係旅游达人都唔得喇。至于佢月览三十本书嘅言论更係一鸣惊人,博学程度媲美一目十行、过目不忘嘅张松,简直係不世嘅奇才。

所以话啫,天生我才必有用。吴局长搞教育固然一塌糊涂,误人子弟,但如果佢即刻转行做导游或者图书馆管理员,话唔定可以发光发热,成为业界奇葩,谂得过o架!

上一篇: 下一篇:

大家正在看